Ang Lupaing Walang Anino

Ano ang lupaing walang anino?

Ang lupaing walang anino ay isang lugar kung saan walang anumang nagkakaroon ng anino. Kasimputla ng gatas ang langit. Ito ang kabaligtaran ng bawat lugar na nadalaw na ni Vela.

Ito ang lupain ni Noon.

Ano ang makikita mo roon?

May walang katapusang puting karagatan sa lahat ng direksiyon. Lumulutang dito ang isla ng dilim, ang pinakahuling maliit na isla ng dilim. Doon nagsiksikan ang mga kaibigan ni Vela, magkakasama, kumakapit nang mahigpit.

Malayo sa kabila ng puti ay ang tore ng mga salamin. Ipinapasa ng mga salamin nito ang liwanag mula sa isa papunta sa susunod, hanggang maging isang nakasisilaw na liyab ang lahat, at makikita mo ang isandaang ikaw.

Sa pinakatuktok ng tore ay ang Orasan ng Araw. Kasinlapad ito ng isang lawa, at tumitiktak ito na parang mabagal na kulog.

Bakit napakadelikado ng lugar na ito?

Naglalaho sa nakasisilaw na liwanag ang lahat ng bagay na sa dilim lang matatagpuan. Sa bawat lagatok ng Orasan ng Araw, isa pa sa mga lugar ni Vela ang naglaho: ang gubat, ang Dagat ng Gabi, ang Bundok ng Niyebe, ang Bahay na Hungkag.

Paano nahanap ni Vela ang daan?

May isang oras na hindi alam bilangin ng orasan ni Noon. Kapag iniatras ang mga orasan, dalawang beses nangyayari ang ala-una. Sa ikalawang ala-una na iyon, may lumitaw na hibla ng dilim sa puting sahig, kasingnipis ng sinulid at kasinlambot ng anino. Si Vela lang ang nakakita nito.

Subukan mo ngayong gabi

Kailangan ng anino ang liwanag at dilim nang magkasama. Itaas mo ang iyong kamay malapit sa lampara at gumawa ng anino. Anong hugis ang kaya mong gawin?